TBC di Sarawak dirami pupu bansa

KUCHING: Pengerami Taun Baru China (TBC) nyerumba taun chit di Sarawak dirami pupu bansa ke bisi ba nengeri tu. Presiden Balai Dagang enggau Industri China Kuching, Datuk Tan Jit Kee madahka pengerami Taun Baru China di Sarawak endang nyelai laban ukai semina dirami bansa China tang mega semua bansa ke bisi di Sarawak. “Ukai nya aja, bida entara parti politik enda nagang bala raban politik ngabang ngagai rumah pangan diri. “Ambika chunto, kemari Kepala Menteri Datuk Patinggi Abang Johari ngabang ngagai rumah tebuka diatur Parti Tindakan Demokratik (DAP),” ku iya lebuh dirandau pemberita ba rumah iya di Jalai Ong Tiang Swee ditu tadi. Ba lansa ke sama, iya mega madahka ekonomi menua kitai disadang manah ke taun tu nyentukka pengujung taun tu ila. Dulu ari nya, Jit Kee mega nerima penemuai ari Abang Johari enggau bini iya Datuk Amar Juma’ani Tun Tuanku Bujang. Bela bisi nyereta pengawa ngabang nya, Sapit Kepala Menteri Tan Sri James Jemut Masing, Menteri Dagang Temuai, Seni enggau Main Asal Datuk Abdul Karim Rahman Hamzah, Menteri Muda ba Opis Kepala Menteri (Undang-undang, Kaul Sarawak enggau Perintah Besai sereta Matau Projek) Datuk Sharifah Hasidah Sayeed Aman Ghazali enggau Kaban Parlimen Batang Sadong Datuk Seri Nancy Shukri. Suara Sarawak